کیا "جبار وقہار"بھی اسمائے حسنی ہیں؟

قرآن میں اللہ تعالی کے بعض ایسے اسما بھی ہیں جو بظاہر قہر وجلال کے اسما ہیں۔مثلا جبار،قہارلیکن قرآن کہتا ہے،وہ بھی"اسمائے حسنی"ہیں۔کیونکہ ان میں قدرت وعدالت کا ظہور ہوا ہے۔اور قدرت وعدالت  حسن وخوبی ہے۔خونخواری وخوفناکی نہیں ہے۔چنانچہ سورہ حشر  میں صفات رحمت وجمال کے ساتھ قہر وجلال کا بھی ذکر کیا ہے اور پھر متصلا ان سب کو "اسمائے حسنی"قرار دیا ہے:﴿هُوَ اللَّهُ الَّذِي لا إِلَهَ إِلاَّ هُوَ الْمَلِكُ الْقُدُّوسُ السَّلامُ الْمُؤْمِنُ الْمُهَيْمِنُ الْعَزِيزُ الْجَبَّارُ الْمُتَكَبِّرُ سُبْحَانَ اللَّهِ عَمَّا يُشْرِكُونَ هُوَ اللَّهُ الْخَالِقُ الْبَارِئُ الْمُصَوِّرُ لَهُ الأَسْمَاء الْحُسْنَى يُسَبِّحُ لَهُ مَا فِي السَّمَاوَاتِ وَالأَرْضِ وَهُوَ الْعَزِيزُ الْحَكِيمُ﴾[الحشر:23-24]-"وہ اللہ ہے جس کے سوا کوئی معبود برحق نہیں ہے۔وہ شہنشاہ ہے،ہرعیب سے پاک ہے،سلامتی دینے والا ہے،امن وسکون عطاکرنے والاہے،سب کا نگہبان ہے،بالادست ہے،ہرچیز پر غالب ہے،شان کبریائی والا ہے،اللہ مشرکوں کے شرک سے پاک ہے۔وہ اللہ پیدا کرنے والا ہے۔ہر مخلوق کو اس کا وجود دینے والا ہے،اس کی صورت بنانے والا ہے۔تمام پیارے نام اسی کے لئے ہیں۔آسمانوں اور زمین میں پائی جانے والی ہرچیز اس کی پاکی بیان کرتی ہے،اور وہ زبردست،بڑی حکمتوں والا ہے۔"۔
[تفصیل کے لئے دیکھو مولانا آزاد کی تفسیر "ترجمان القرآن" سورہ فاتحہ کی تفسیر]